Օրենսդրական փոփոխություններ

Ֆինանսական կազմակերպությունը ֆիզիկական անձի գրավոր դիմումով, նրա ինքնությունն ստուգելուց և նույնականացնելուց հետո, պարտավոր է հինգ աշխատանքային օրվա ընթացքում էլեկտրոնային եղանակով անվճար տեղեկանք տրամադրել տվյալ անձի անունով բանկային հաշիվների առկայության կամ բացակայության մասին։ Անձի պահանջով տեղեկանքը ներառում է նաև նշված ժամանակահատվածի հաշվի մնացորդը և կողմերի փոխադարձ պարտավորությունների առկայությունը կամ բացակայությունը։ Պահանջը տարածվում է նաև դիմելու պահին տվյալ կազմակերպության հաճախորդ չհանդիսացող անձանց վրա, իսկ թղթային տեղեկանքը յուրաքանչյուր օրացուցային տարում առնվազն մեկ անգամ տրամադրվում է անվճար։

Սահմանվել են նոր և վերանայված տեղական տուրքեր։ Համայնքի անվանումը կամ խորհրդանիշը ապրանքային նշանում, ֆիրմային անվանման մեջ կամ առևտրային գործունեությունում օգտագործելու թույլտվության տարեկան տուրքը կազմում է 100–300 հազար դրամ։ Հանրային սննդի օբյեկտին հարակից ընդհանուր օգտագործման տարածքի համար սահմանվել է 10 հազար դրամ՝ մեկ քմ-ի հաշվով, իսկ դրսում տեղադրված յուրաքանչյուր ավտոմատ ինքնասպասարկող սարքի համար՝ ամսական 10–15 հազար դրամ։ Քաղաքային համայնքներում և Երևանում որոշ դրույքաչափեր կարող են բարձրացվել համապատասխանաբար մինչև 3 և 7 անգամ։

Շենքերից և շինություններից դուրս ավտոմատ ինքնասպասարկող սարքերով առևտուր կամ ծառայություն կարող են իրականացնել միայն իրավաբանական անձինք և ԱՁ-ները՝ համայնքի ղեկավարի թույլտվությամբ։ Համայնքի ավագանին սահմանում է թույլտվության կարգը, պայմաններն ու սահմանափակումները, թույլատրելի ապրանքներն ու ծառայությունները, ինչպես նաև տեղադրման և հեռավորության պահանջները։

Նոր խմբագրությամբ կարգավորվում է արտաքին գովազդը բնակավայրերում։ Գովազդի ծավալը, քանակը, տեղադրման կարգն ու պայմանները սահմանում է համայնքի ավագանին, իսկ ընդհանուր օգտագործման վայրերում, հենասյուների, ծառերի և քաղաքային կահավորման տարրերի վրա տեղադրումը պահանջում է համայնքի ղեկավարի թույլտվություն։ Թանգարաններում, պատմամշակութային հուշարձանների ներքին տարածքներում և պետական ու համայնքային մարմինների շենքերում ու տարածքներում արտաքին գովազդն արգելվում է։

Փոփոխությունները վերաբերում են լքված գույքի և թափոնների համայնքային սեփականություն անցնելուն, ինքնակամ կառույցների քանդմանը և հողօգտագործման իրավունքի դադարեցման հետևանքներին։ Մասնավոր հողամասի սեփականատերը համայնքի ղեկավարի գրավոր պահանջից հետո, որպես կանոն, մեկ ամսում պետք է քանդի ինքնակամ կառույցը և վերականգնի հողամասը։ Հողօգտագործման իրավունքի դադարեցման դեպքում շենքերն ու այլ անշարժ գույքը կարող են դատարանի վճռով անցնել հողի սեփականատիրոջը՝ շուկայական արժեքին համարժեք փոխհատուցմամբ, եթե պայմանագրով այլ բան նախատեսված չէ։

Վերանայվել են անշարժ գույքի հարկի և փոխադրամիջոցների գույքահարկի վճարման ու պետական գրանցման կապակցված պահանջները։ Կազմակերպությունը անշարժ գույքի գրանցումից կամ նոր վկայական ստանալուց առաջ պետք է մարի տվյալ համայնքում իր բոլոր հարկվող անշարժ գույքերի պարտավորությունները, իսկ փոխադրամիջոցի գրանցման, վերահաշվառման, հաշվառումից հանելու կամ նոր վկայական ստանալու դեպքում՝ տվյալ համայնքում հաշվառված բոլոր փոխադրամիջոցների գույքահարկը։ Գրանցող մարմինը գործում է պարտավորությունների բացակայության մասին, այդ թվում՝ էլեկտրոնային տեղեկանքի հիման վրա։

Կարգավորվել է այն պետական կամ համայնքային հողամասերի վարձակալության կամ անհատույց օգտագործման իրավունքի մասնակի դադարեցումը, որոնց վրա գտնվում են այլ անձի սեփականություն հանդիսացող շենքեր կամ շինություններ։ Պայմանագրի ժամկետի ավարտից հետո հողամասի սեփականատերը կարող է հաստատված հատակագծով գրանցել իրավունքի դադարեցումը՝ պահպանելով միայն շենքով կամ շինությամբ զբաղեցված հատվածը, առանց շինության սեփականության իրավունքը վերագրանցելու։

2026 թ. սեպտեմբերի 1-ից ուժի մեջ են մտել հաշվարկային փաստաթղթերի դուրսգրման ժամկետներին և ՀԴՄ կտրոններին վերաբերող դրույթները։ Ապրանքի մատակարարման հաշվարկային փաստաթուղթը պետք է դուրս գրվի մինչև մատակարարումը, աշխատանքի կամ ծառայության փաստաթուղթը՝ կատարման ավարտի պահին, այդ թվում՝ պայմանագրային փուլերով, իսկ բեռնագիրը՝ մինչև ապրանքի տեղափոխումը։ Կանխիկ, քարտով կամ այլ վճարային գործիքով հաշվարկ կատարելիս ՀԴՄ կիրառողը պարտավոր է տրամադրել ՀԴՄ կտրոն։ Էլեկտրոնային ՀԴՄ-ի կիրառության ընդլայնված կանոններն ու 500 հազար դրամ տուգանքը հիմնականում գործելու են 2027 թ. հունվարի 1-ից։

Փոխվել է մեկ ապրանքային հայտարարագրով հայտարարագրվող ապրանքների բացթողման մաքսային գործառնությունների պետական տուրքի հաշվարկը։ Տուրքն այժմ կախված է ապրանքների բրուտտո քաշից՝ մինչև 3 տոննայի համար բազային տուրքի 7-ապատիկից մինչև 60 տոննայից ավելի քաշի համար 35-ապատիկ։ Ժամանման վայրի մաքսային մարմնից մինչև ներքին մաքսային մարմին տեղափոխելու նպատակով հայտարարագրման դեպքը հանվել է համապատասխան տուրքի կիրառման շրջանակից։

Կանոնակարգ 17/02-ը ամբողջությամբ շարադրվել է նոր խմբագրությամբ։ Փոփոխությունները հստակեցնում են վճարահաշվարկային կազմակերպությունների գործունեության կարգավորումը, ընդհանուր կապիտալի նվազագույն՝ 100 մլն դրամ նորմատիվը, իրացվելիության նվազագույն՝ 60% հարաբերակցությունը, հաշվարկի տարրերը և ամսական հաշվետվողականությունը։ Որոշումն ուժի մեջ է մտնում 2026 թ. սեպտեմբերի 1-ից։