ԱՁ, ՍՊԸ, թե՞ ԲԸ
ԱՁ-ն հարմար է, երբ անձը ցանկանում է գործունեություն իրականացնել իր անունից և պատրաստ է պարտավորությունների համար պատասխանատվություն կրել անձնական գույքով։ ՍՊԸ-ն առանձին իրավաբանական անձ է և սովորաբար ավելի հարմար է գործընկերներով բիզնեսի, ներդրումների, աշխատակիցների ներգրավման կամ ռիսկերի տարանջատման համար։ ԲԸ-ն նպատակահարմար է բաժնետիրական կառուցվածքի, բաժնետոմսերի թողարկման կամ ավելի լայն ներդրումային շրջանակի դեպքում։ Ընտրությունը պետք է կատարել՝ հաշվի առնելով կառավարման, պատասխանատվության, հարկերի և ապագա ծրագրերի առանձնահատկությունները։
Ի՞նչ է անհրաժեշտ
- ԱՁ-ի համար՝ անձը հաստատող փաստաթուղթ, հանրային ծառայությունների համարանիշ կամ համապատասխան տեղեկանք, հաշվառման/բնակության և գործունեության հասցե, կապի տվյալներ։
- ՍՊԸ-ի համար՝ հիմնադրի որոշում կամ հիմնադիր ժողովի արձանագրություն, կանոնադրություն, տնօրենի տվյալներ, իրավաբանական հասցե և մասնակիցների նույնականացման տվյալներ։
- ԲԸ-ի համար՝ հիմնադիրների որոշում կամ ժողովի արձանագրություն, կանոնադրություն, բաժնետոմսերի և կառավարման մարմինների վերաբերյալ անհրաժեշտ տվյալներ։
- Օտարերկրյա անձանց փաստաթղթերը, ըստ դեպքի, պետք է վավերացվեն կամ ապոստիլավորվեն և ներկայացվեն հայերեն պատշաճ թարգմանությամբ։
Գրանցման երկու տարբերակ
Անձամբ կամ առցանց
Հիմնադիրը կարող է դիմել Պետական ռեգիստրի սպասարկման գրասենյակ կամ օգտվել էլեկտրոնային համակարգից, եթե ունի անհրաժեշտ նույնականացման և էլեկտրոնային ստորագրության միջոցները։ Նմուշային փաստաթղթերի կիրառման դեպքում գործընթացը կարող է ավարտվել անմիջապես։
Մեր միջոցով՝ հեռավար
Եթե հիմնադիրը Հայաստանում չէ կամ չի ցանկանում անձամբ զբաղվել ընթացակարգով, փաստաթղթերը կարող են նախապես պատրաստվել և փոխանցվել մեզ։ Պատշաճ ձևակերպված լիազորագրի և անհրաժեշտ բնօրինակների/թարգմանությունների հիման վրա մենք կներկայացնենք փաթեթը և կհետևենք գրանցման ավարտին։
Ժամկետներ և պետական տուրք
ԱՁ-ի պետական հաշվառումը, որպես կանոն, կատարվում է փաստաթղթերը ներկայացնելու պահին։ Առևտրային կազմակերպության գրանցումը կատարվում է ոչ ուշ, քան մեկ աշխատանքային օրում, իսկ եթե հիմնադիրների կազմում կա իրավաբանական անձ՝ ոչ ուշ, քան երկու աշխատանքային օրում։ Սովորական առևտրային կազմակերպության սկզբնական գրանցման համար պետական տուրք չի գանձվում։ ԱՁ-ի պետական հաշվառման պետական տուրքը 3,000 ՀՀ դրամ է։ Օտարերկրյա հիմնադիրների և հատուկ կազմակերպաիրավական ձևերի դեպքում կարող են լինել այլ վճարներ, ինչպես նաև թարգմանության, նոտարական վավերացման կամ ապոստիլի ծախսեր։
Գրանցումից հետո՝ հարկային առաջին քայլը
Գրանցման արդյունքում կազմակերպությանը կամ ԱՁ-ին ինքնաշխատ շնորհվում է ՀՎՀՀ։ Սակայն դրանով հարկային ընտրությունը չի ավարտվում։ Եթե գործունեությունն ու օրենքով սահմանված պայմանները թույլ են տալիս ընտրել շրջանառության հարկ կամ միկրոձեռնարկատիրության համակարգ, համապատասխան հայտարարությունը հարկային մարմին պետք է ներկայացնել գրանցման օրվան հաջորդող 20-րդ օրը ներառյալ։ Ժամկետը բաց թողնելու դեպքում տնտեսվարողը, որպես կանոն, գործում է հարկման ընդհանուր համակարգում։ Հարկման տարբերակը պետք է ընտրել մինչև առաջին գործարքները՝ հաշվի առնելով գործունեության տեսակը, շրջանառությունը, ծախսերը և հաճախորդների կազմը։
Ի՞նչը ևս պետք է կազմակերպել
- 01Բանկային հաշիվ և ինտերնետ-բանկինգ։
- 02Էլեկտրոնային հաշվետվությունների համակարգի հասանելիություն և էլեկտրոնային ստորագրություն։
- 03ՀԴՄ կամ էլեկտրոնային հաշիվների համակարգ՝ եթե կիրառելի է գործունեությանը։
- 04Աշխատակիցների գրանցում մինչև աշխատանքի փաստացի սկիզբը։
- 05Լիցենզիա, թույլտվություն կամ ծանուցում՝ եթե գործունեության տեսակը դա պահանջում է։
- 06Իրավաբանական անձի դեպքում՝ իրական շահառուների հայտարարագիր օրենքով սահմանված կարգով։
FIAK · Աջակցություն
FIAK-ի աջակցությունը
Մենք կօգնենք ընտրել ճիշտ կազմակերպաիրավական և հարկման ձևը, կպատրաստենք հիմնադիր որոշումը, կանոնադրությունը, լիազորագիրը և անհրաժեշտ մյուս փաստաթղթերը, կկազմակերպենք թարգմանությունն ու վավերացումը և կուղեկցենք գրանցումից մինչև բանկային ու հարկային առաջին քայլերը։
Ստանալ խորհրդատվությունՆյութը ընդհանուր տեղեկատվական բնույթ ունի․ կոնկրետ պահանջները կարող են տարբեր լինել՝ կախված հիմնադիրներից, գործունեության տեսակից և ընտրված կազմակերպաիրավական ձևից։
